Colega ta fayece y trabou mester a continua cu su cadaver den oficina.

Telefonista nan na un oficina a sigui atende yamada durante dos ora y cuarenta minuut den e mesun oficina cu e cadaver di nan colega.

Tawata mustra manera un dia comun na oficina di un call center yama ‘Konecta España’ na Madrid ora cu rond di 12’or di merdia un empleado a sufri di un infarto.
Inma di 57 aña tawata sinta na su lesenaar y e la hisa su man mientras cu e ta trahando pa pidi asistencia.
E coordinadora presente a wak e y a pensa cu Inma tawata mester di asistencia technico pa atende cu un cliente, pero Inma tawata sufriendo di un infarto.
Mesora a purba di brinda Inma tur asistencia posibel pero lamentablemente Inma a fayece.

Esaki a laga tur colega den un shock grandi pero locual cu a hasi e situacion pio ta na momento cu nan mester a sigui traha y atende yamada.  
Inma su colega nan a sigui traha pa casi tres ora largo cu Inma su curpa riba vloer. 

E caso aki a bira viral mesora y aunke cu e compania a desmenti di a obliga e trahado nan pa sigui traha e echo nan segun e empleado nan ta mustra diferente.