Genaila Thiel y Zaïr York ta dos rubiano cu tin 6 aña ja hunto y cu tin casi 4 aña bibando na Hulanda na Amsterdam. Genaila durante su estudio na Universidad di Aruba a haña un oportunidad den comienso di 2017 pa por hasi un exchange semester na Hulanda y a bay hunto cu su pareha Zaïr y nan a gusta Hulanda masha hopi mes. Asina Genaila y Zaïr a dicidi pa bai biba na Hulanda manera cu Genaila a gradua cu su bachelor den Bedrijfseconomie na Juli 2018. Zaïr tambe a probecha pa sigi su estudio na Hulanda y a gradua na Juli 2021 cu su diploma como juridisch-administratief dienstverlener.

Genaila y Zaïr semper tabata tin e soño pa tin nan mesun negoshi pero nan no tabata kier un cualkier cu ta bende diferente di cos, pero a focus special riba un niche cu Genaila conoce hopi bon cual ta makeup. Genaila ora tabata un tiener tabata un bailarina y mester a sinja hasi stage makeup y asina su passion pa makeup a keda crece mas y mas. Den e pandemia, tur cos tabata cambiando pa online y asina Genaila y Zaïr a dicidi cu ta e momento perfecto pa por launch nan brand completamente online y asina GT Beauty a cuminsa na September 2020.

GT Beauty ta un brand cu a focus na comienso cu producto nan special pa lashes y wenkbrauw y cu tempo a expande e rango di producto cu mas makeup products manera concealer y lipstick y tambe makeup brushes y tools. Tur producto di GT Beauty ta vegan y cruelty free. Nan brand ta ful ros, cual ta e color favorito di Genaila. Nan tin nan mesun webshop cual ta gtbeautyshop.com unda cu hende nan na Hulanda, Belgie, Aruba y Kòrsou por bestel. 
Pa Aruba y Kòrsou nan tin e opcion cu cliente por kies pa paga cu "Cash on Delivery" cual ta insera cu bo por bestel online y paga cash of cu local transfer ora bo ricibi bo producto y no lo mester di ningun credit card. Pa hende nan cu no tin conocimiento con pa navega riba nan webshop por hasi un order tambe cu nan via Facebook, Instagram of via Whatsapp. Nan producto ja caba ta den stock na Aruba y Kòrsou, esey kiermen cu bo lo ricibi bo producto(nan) den bo man riba e mesun dia cu bo order.

Aparte di nan webshop, nan ta bende tambe riba e plataforma grandi na Hulanda cual ta bol.com cu mas di 10 miyon cliente na Hulanda y Belgie. Recientemente nan a wordo aserca di e plataforma ankorstore.com pa por bende nan producto na prijs wholesale special pa retailers nan ful rond di Europa incluyendo Francia y Inglatera. Nan ta hopi orguyoso di e ultimo stap aki dor cu aworaki e brand lo wordo reconoci mas caminda y ta spera cu poco poco e brand crece bira mas grandi y uno renombra rond mundo.

Nan conseho pa otro entrepreneurs nan ta pa sigi den locual cu nan ta kere aden y cu no wordo desmotiva ora cos no ta bayendo manera cu nan kier. Djies sigi pusha, ta consistente den locual bo ta hasi y kere den bo soño paso nada ta imposibel.