E cacho cu a haya e mucha nan a resulta perdi.

Un luna pasa a sosode un caso cu sigur a cautiva e nacion y e ehercito Colombiano. 
Cuater mucha tawata di biahe cu nan mama y un pasahero mas unda na dado momento e piloot a reporta un fayo den e motor di e avion y a anuncia e emergencia prome cu e avion a desparece for di radar 7:30 di mainta, dia 1 di mei.

Mesora forsa aereo di Colombia a desplega avion y helicopter nan di rescate y a cuminsa busca e avion. E comunidad indigeno tambe a uni na e buskeda aki. Na momento cu a haya e resto di e avion a haya e curpa di e 3 adulto nan abordo, mas sinembargo no a haya ningun señal di e cuatro mucha nan di 1,4,9 y 13 aña cu tambe tawata abordo den e avion. 
A haya marca di sapato, pampers y sapato mes di e mucha nan durante di e buskeda y esaki a mantene e speransa cu e mucha nan lo ta na bida. 
Wilson, un cacho di rescate tambe a participa den e Operacion ‘Esperansa’ pa rescata e mucha nan for di e selva na unda nan a keda perdi.

Despues di cuarenta dia desapareci, finalmente a haya e e mucha nan. 
E mucha nan a ser hiba na un hospital militar na Bogota pa nan por haya observacion medico y pa asina verifica nan estado di salud.

Apesar di e felicidad cu a logra haya e mucha nan, ainda autoridad nan no por haya paradero di Wilson, cu ta esun responsabel pa a haya e mucha nan pero cu a perde na momento cu a haya e mucha nan. 
Autoridad nan ta pensa cu kisas bestia nan peligroso lo a spanta Wilson y e lo a bay sconde. 

No ta conoci con e mucha nan aki a sobrevivi den e selva aki cu awasero fuerte, colebra y bestia nan venenoso.

“E mucha nan aki a bira un ehempel di sobrevivencia cu sigur lo keda den historia.”
Asina e Presidente Gustavo Petro a expresa.
“Nan ta mucha nan di selva y awor nan a bira mucha nan di Colombia.”