Personahe di siman: Edjean Semeleer cumpliendo 30 aña den farandula cu un amor y pasion grandi pa nos cultura. 

​

Edjean Semeleer a cumpli e aña aki 30 aña den farandula dia 13 di maart. Edjean a nace na Aruba dia 10 di december aña 1983. Tur cos a cuminsa ora Edjean tabata mucha, su mayornan tabata ripara su abilidad musical. Specialmente durante fiestanan di famia cu e tabata canta pa tur hende, Ora e tabata den derde basis na Pius X School su juffrouw Ethel Marchena, a keda impresiona y emociona ora cu e mester a canta den klas pa haya punto. el a canta "Atardi" di Rudy Plaate y juffrouw Ethel a bira hopi emociona. El a papia cu e hoofd di scol, Meneer Eric Rincones, pa permiti Edjean canta durante e scol su Prome Santa Comunion. Esey a sosode. Cancion di mas grandi di Edjean ta entre "Mi mitad pa Eternidad" y "Gosadera". No ta importa e temporada di aña, semper ta e dosnan aki ta esnan cu mas Edjean su publico ta pidi pe. Edjean a participa na Festival Voz-i- Landia na aña 1994. Su carera musical a cuminsaden e festival aki. E dia aki su cancion a sali na di dos lugar y el a sali di tres lugar den bos. El a participa tambe den Festival di himno y bandera cu el a gana dos bes y tambe Edjean a participa den Festival di Dande. El a sali 3 bes Rey di Dande y un bes nan a corona Edjean como e "Rey di Reynan di Dande". Edjean ta contento di mira cuanto creatividad ta brota den creacion di musica riba Aruba. Sinembargo, hopi bes e ta sinti lastima cu menos y menos ta pone atencion na contenido lirico di musica. Aki e ta referi na e letranan di varios cancion cu pa su gusto, ta laga di desea. 

​

"Kico nos falta na Aruba pa yuda nos artistanan local?"

Falta pa por prueba cu evidencia kico e impacto ta di nos artistanan y sernan creativo local, no solamente riba bienestar di e ser humano pero tambe riba desaroyo social, cultural y economico. E mentalidad mester cambia for di considera nos artistanan y sernan creativo como hendenan cu ta "dijs haci algo leuk" pa "hendenan cu ta crea rikesa y cu tin hopi impacto y potencial pa cu desaroya y bienestar". Aruba mester formalisa y desaroya su Industrianan Cultural y Creativo pa nos artistanan y sernan creativo pa mehora continuamente, pero tambe pa nos por tin hopi mas oportunidad pa progresa. Pa esnan cu pa prome bes ta lesa "Industrianan Cultural y Creativo", Edjean ta recomenda pa haci un poco research online y mira cuanto oportunidad esaki ta brinda na cualkier pais. 

​

Desde e pandemia di Covid-19 a cuminsa, practicamente tur luna Edjean tabata presenta un concierto for di e sala di unda e ta biba, pero como un "live broadcast" ya cu no tabata permiti publico. Esaki tabata no solamente pa crea entrada pa por sigui genera fondo, pero tambe pa crea mas oportunidad y entrada pa otro cantante, musiconan, sernan creatico y tur e companianan local a mira e balor di participa door di haci propaganda. Ora cu a cuminsa permiti publico, e idea a continua y te cu awe e ta un exito. E fondo genera despues di paga gastos ta bay pa nan fundacion Go Cultura pa por sigui haci e trabaonan importante.

​

Edjean su logro di mas importante den bida, ta pa descubri su proposito den bida, pa stima sin fin y pa purba biba contento sin preocupa su cabes riba opinion di otro hende. 

​

"Bida ta pasahero, disfrut'e. No laga nada stroba bo, wanta bo of kibra bo. Bida ta un regalo. Apreci'e!"