Listen Live !

Watch Live !

"Nos a topa bo tata morto riba cama” Gisette Croes ta conta nos cu su mundo a bin abou!

Nos ta dilanti un celebracion nacional pa Aruba, Celebrando bida y logro di nos libertador Betico Croes, su fecha natalicio.

Nos team di website a hiba un combersacion profundo cu su yui muhe Gisette Croes riba su tata cu tambe tawata e tata di Aruba. Gisette ta conta nos:

Pa un yiu muhe, bo tata ta bo prome amor. Mi tata pa mi tabata e miho tata na mundo. Un tata comprensivo, cariñoso, atento…..ora cu e tabatin tempo. Mi tata a drenta politica tempo mi tabatin 6 aña. Ainda a toca mi e dicha di experenci’e como maestro di scol. Pues pa mi tabata un placer di por bay cu mi mama den auto busc’e ora scol caba djis pa mi baha bay busc’e den su klas unda e tabata duna les. Despues manera tempo a bay transcuriendo, menos y menos mi tabata wak e. Tabata pasa tin biaha un siman cu mi no ta wak e, bibando cu ne den cas. Ora cu mi mama hiba nos scol, ainda e tabata drumi y anochi, ora di yega cas ya nos tabata drumi. Esaki tabata un gran enseñansa den mi bida. El a pone mi aprecia tempo pa otro, siña mi e diferencia entre calidad y cantidad. E tiki tempo cu e tabatin pa nos, nos como yiu a siña balora.

Dia cu el a fayece, mi mundo a cay den otro. “Wij hebben jouw vader dood in bed aangetroffen” ta palabranan cu un yiu nunca kier tende. Su morto a trece cu ne pa mi, cu mi mester a cuminsa completamente di nobo. Nos a traha asina hopi plannan hunto a base di cual mi a scoge e direccion di mi estudionan. Pues ora cu el a fayece, diripente mi tabata sin plan, sin meta, sin direccion. A tuma hopi tempo pa mi por a recobra e forsa y forma mi mes. Den esaki di berdad, mi ta gradici Dios pa mi mama cu a biba pa nos y a dedica su bida na nos.

Mientras tanto tur su 4 yiunan a surpasa e edad cu cual el a fayece. Y apesar cu 35 aña a pasa caba, tur aña riba su cumpleaño esta Dia di Betico, mi ta desea di por tabata cantando cumple año feliz p’e. Un cos asina simpel pero cu ta celebracion di ta na bida. Mi ta purba inculca amor pa ‘OpaBetico’ den mi subrinonan, su nietonan. Nan mester continua cu e tarea di no laga su memoria y historia desvanece.

Kico ami a siña di Betico e Politico

Hopi cos mi a siña di Betico a base di videonan cu mi a wak, documentarionan cu mi a traha, investigacionnan cu mi a haci, entrevistanan cu mi a hiba y mas cu claro e añanan comparti cune. Mi tin un gran admiracion pa Betico e politico y Betico e hende. E strategia cu el a uza pa convence Hulanda pa duna Aruba su Status Aparte, despues di 12 aña di lucha, ta hacie ungran estadista. E atencion personal cu e tabatin pa tur hende ta simplemente increibel. No tin un hende cu no tin su storia y recuerdo di Betico.

Locual cu ami a siña di Betico ta pa nunca entrega. Nunca rindi. No importa con grandi y fuerte e oposicion ta, ni maske con imposibel e por ta mustra, si abo ta kere den bo meta, lucha pa bo logr’e. Manera cu ami ta expres’e: “Encontra e Betico den bo y lucha pa bo soñonan”.

Team Ivo4life kier a gradici Gisette Croes pa e entrevista aki y desea Aruba completo un feliz dia di Betico.