Hefe di restaurant conoci ta basha awa cayente riba dos cliente. 

Recientemente tabatin un incidente poco comun na Dallas, Merca. Ta trata di un hefe di e restaurant di cuminda rapido, Taco Bell, a tira awa cayente riba 2 cliente, ora nan a bisa cu nan pedido di $31 no tabata corecto. Mester a transporta e clientenan aki inmediatamente pa hospital. Tur cos a cuminsa, na momento cu e clientenan tabata den drive-thru y nan a ripara, cu nan pedido no tabata corecto. Nan a para e auto y baha bay paden, pero e lugar tabata sera caba. Asina mes un empleado a habri e porta pa nan drenta y e clientenan a puntra si nan por cambia e pedido pa esun corecto. Un di e empleadonan a bira fresco cu e clientenan prome cu e hefe a yega. 
Ora nan a cuminsa discuti, e hefe tabata tin un hemchi cu awa cayente den su man y el a tira e clientenan cu e awa cayente aki. 
Finalmente e clientenan a logra scapa for di e restaurant. Mientras cu e clientenan tabata saliendo, tur e empleadonan tabata hari y bati man. Britanny David y su sobrino, cu ta un menor, a keda cu trauma. Lamentablemente e menor a keda cu kima na su cara, pia, brasa y bariga.