Hoben a enfrenta peliger di candela pa rescata 25 cacho chikito cu tawata atrapa y casi muri.

Un heroe na Peru!

Durante un candela structural na Lima, un hoben Colombiano a resulta di ta un heroe.
Riba e dak di e edificio na candela tawata tin 25 cacho atrapa.
Sin importa e peliger na e momento ey, e Colombiano Sebastian Arias a subi riba un balcon y asina e la logra yega na tercer piso na unda cu e mester a kibra un bentana pa asina e por subi riba e dak di e edificio.
Un pa un e la tira e cacho nan abou mientras demas persona tawata catch nan cu corchon y paña y asina a logra salvaguardia tur cacho.

Segun medio di comunicacion peruano, e candela a tuma lugar na parti paden di un edificio di reciclahe y esaki a rekeri diesun unidad di bombero pa enfrenta e emergencia. E origen di e candela no ta conoci.
E unidad nan di bombero a lucha pa mas di cuater ora pa termina e candela y durante di e proceso aki tres bombero a keda herida. Inmediatamente nan a ricibi atencion medico y por a bay cas mesora.

Red nan social ta conmovi y emociona cu e video di Sebastian na unda cu por mira claramente con e hoben ta risca su bida pa salba tur e cacho nan prome cu e candela alcansa nan.

E hoben a expresa cu e la sinti cu e ta su deber pa yuda e cacho nan como cu e tin un y e no ta capas di imagina su cacho ta muri kima. 
“Mi a wak e cacho ariba na e skina di e dak y mi a pensa cu ami tin un cacho asina stima y cu mi no lo soporta pa mi cacho muri kima.
Scuchando e cacho nan ta yora mi no por a imagina cu ni mi cacho ni niun otro cacho lo por muri di e forma aki. Mi ta stima cacho masha hopi mes.”

Sebastian tawata traha pa e compania di reciclahe cu a kima y pesey e tawata sa precies na unda e cacho nan ta frecuentemente.

“Mi no sa con mi a subi yega e dak asina lihe, mi adrenalina a pone mi subi mesora”
Asina e heroe di e suceso aki a expresa por ultimo.

Sigur un acto heroico unda cu Sebastian su balentia a keda admira door di tur cu a presencia e momento aki.