Hoben cu a perde ocho aña pasa a aparece cu indicacion di maltrato y for di tino dilanti un misa. 

​

Cu solamente 17 aña Rudy Farias a desaparece na momento cu e la sali for di cas pa cana cu su dos cacho nan cu a regresa sin Rudy.
Esaki a pasa na maart 2015 na Houston, Texas y inmediatamente famia a notifica autoridad nan y asina nan a cuminsa un buskeda cu a dura un siman.  

Na 2015 a informa cu Rudy a keda diagnostica cu despreshon y transtorno di stress y ansiedad. 
Rudy a cuminsa sufri di depreshon despues di e morto di su ruman mayor cu a perde su bida den un accident cu brommer. 
Desde e tempo ey e organisacion ‘Texas EquuSearch’ a solicita ayudo di publico pa asina haya Rudy indicando cu tawata tin e posibilidad cu e lo ta desorienta y sin tuma su medicina nan.

Ocho aña despues nan ta haya Rudy golpia y for di tino dilanti di un misa despues di un yamada anonimo, segun e Centro di Desaparecido a informa. 
E mama, Janie Farias, a expresa na e canal local ABC cu Rudy a ser hiba na hospital como cu e tawata tur blousa, cu corta nan na su curpa y sanger na su cabes. 
Rudy a bisa solamente algun palabra te cu awor y pa e motibo aki autoridad nan no a logra papia cu Rudy ainda y ta warda e recupera prome.

“Despues di casi un decada perdi, nos ta contento cu a haya Rudy bek y cu awor e ta ricibiendo e cuido cu e mester. Sigui manetene e famia den boso oracion mientras cu Rudy ta recupera na hospital.” Asina e Centro di Desaparicion di Texas a expresa riba nan pagina di Twitter.