Lienchie Merryweather:

“Mi lo desea di mira e grandioso ‘Lighting Parade’ di antes bek!”

E aña aki Champagne Carnival Group ta cumpli 25 aña di existencia y tur cos a cuminsa cu sra. Lienchie Merryweather, cu no ta un persona desconoci den nos comunidad. Lienchie ta un persona hopi social, cu ta cla pa yuda tur hende, unda cu e por. Banda di esey Lienchie ta directora di su mesun speelschool pa 20 aña (Little Bird Speelschool) caba. A pesar cu Lienchie ta un persona hopi ocupa, toch ora e haya un chens liber, e gusta bay lama.

Lienchie su grupo di Carnaval a cuminsa entre su amigo- y amiganan 25 aña pasa. Tur cos a cuminsa ora cu entre nan tur, nan a paga un banda pa subi caminda bou di nomber di Tivoli y asina nan a dicidi pa join nan mesun grupo bou di nomber di: Champagne Carnival Group. E motibo cu nan a scoge e nomber ey, ta door cu nan tabata un grupo cu tabata bebe champagne. E tempo ey e grupo tabata consisti di dos seccion: 1; youth champagne, cual ta e inicio di e grupo y 2; cual ta e parti pa adulto.

Lienchi su motivacion pa Carnaval tur aña ta, pa e participantenan di tur aña bolbe cerca dje y pa kere den su persona y su grupo Champagne. Carnaval ta simpelmente tur cos p’e! Lienchi ta biba pa Carnaval y p’e Carnaval no ta un ‘season’, paso ta ful aña e ta traha riba Carnaval. Lienchi a conta nos cu den su famia, e unico cu no ta gusta Carnaval ta su yiu homber; Matthew Paesch. E yiu muher di Lienchie, Melony Croes-Paesch, a sali reina infantil di Aruba na 1992 y First Runnerup na 2002 di Reina Hubenil. Lienchie su otro yiu muher, Michelle Marie Pimienta-Paesch, a sali Reina Hubenil di Juliana School tambe.

E Carnaval aki ta bay ta esun mas duro pa Lienchie, ya cu su mama, cu semper a forma parti di su grupo, no lo t’ey. Lienchie a menciona, cu despues di e perdida su mama, el a kere cu e no lo por a sigui cu Carnaval. Pero el a bisa: “Ora bo tin un compromiso cu un grupo asina grandi, bo no por para tur cos, pues manera nan ta bisa: ‘the show must go on’!” Y e ta sigur cu su mama tambe lo a pensa asina.

Un cambio cu Lienchie lo kier mira den nos Carnaval ta, pa mira bek nos grandioso ‘Lighting Parade’ manera antes; esta cu tremendo roadpieces, hopi garosa y hopi uzo di luz.                              

Conseho: “Hopi biaha bo ta tende; ‘no tin placa pa bay Carnaval’, paso Carnaval a bira algo costoso. Sinembargo, si cuminsa di trempan, por paga poco poco y toch logra participa, sin cu e mester ta hopi costoso. Ami lo conseha pa cuminsa na tempo pa ‘make it happen’ y keda engrandece e Carnaval, pa nos keda cu e cultura y tradicion aki pa hopi aña mas. Ta e hobennan mester sigui cu e tradicion di Carnaval, kiermen ta importante pa nan sigui cu esaki y stimula pa hopi mucha/hoben participa. Como mama nos tin cu motiva e muchanan for di jong, pa nan mes prepara nan paña, decora y cumpra stenchi y asina stimula nan, pa nan keda mantene nos tradicion y cultura”.