Listen Live !

Watch Live !

By: Zaynah Yanez

25 nov 2024

Marisol Tromp: 27 aña ta sirbi pueblo den politica na interes di Aruba.

Awe nos team a entrevista e di 6 politico cu ta lider di partido MAS Marisol Tromp.

Nomber completo y fecha di nacemento?

Marisol Juliette Tromp
28 di september 1969

- Conta nos un tiki di bo infancia, cua skol bo a bay, hobby y kico tawata e prome funcion cu bo kier a eherce tempo bo tawata chikito?

Mi ta yiu di Yvonne Tromp Frans y Dominico Tromp q.e.p.d. y mi tin un ruman muher Lelicia Tromp. Ma lanta den un famia caminda fei chikito mi a mira mi mayornan hopi envolvi y activo den diferente organisacion y causa. Mi mama banda di su trabou y e sosten pa mi tata den politica antes, semper tawata activo cu trabounan voluntario pa juda e.o. hobennan, esnan cu limitacion atravez di directiva di Stichting Ambiente Feliz y tambe dedica na teatro hunto cu mi tata den Mascaruba, den gruponan di oracion , etc. Mi tata banda di su trabou den enseñanza, tawata activo como lider politico di PPA ora mi twt mucha y semper stimulando mi den mi estudio. Mi a bai skol basico Colegio Bon Bini na Madiki, y despues Colegio Arubano VWO, y a studia despues na Katholieke Universiteit na Nijmegen ( awe Radboud Universiteit). Ora mi tawata chikito mi kier a traha den un biblioteca, paso mi tawata gusta lesa tur buki di mi serienan preferi y ora mi tawata bai skol basico casi tur dia mi tawata bai biblioteca na Playa y bin cas lesa dos buki pa dia.

- Na unda bo a studia y con e experencia di ta studiante tawata pa bo y cua ta e diploma nan cu bo a logra?

Mi a studia na Hulanda na antes jama Katholieke Universiteit Nijmegen (KUN) cu awendia jama Radboud Universiteit Nijmegen. Mi a bai studia Psycologia, despues a scohe pa Pedagogische Wetenschappen richting Gezinspedagogiek den cual mi a gradua como docterandus ( Master of Arts) na 1995.

- Con bo a drenta politica? Cua ta e prome partido cu bo a drenta politica y pakico e partido ey y dicon bo a sali di e partido ey?

Mi tawata trahando ya dos aña na Departamento pa Asuntonan Social den e seccion di Dificultad di Bida y Famia, ora ma wordu aserka door di Nel Oduber pa subi lista di MEP. E tempo ey MEP a rehubenece su lista di candidatonan y como hende muher hoben profesional mi a haña e oportunidad pa hiba e trabou den ramo social cu mi tawata hasiendo pa nos famianan y hobennan, na un nivel nacional den Parlamento di Aruba. Despues di a traha como casi 13 aña den MEP como Parlamentario, Minister di Asuntonan social y Infrastructura y di Enseñanza y vice Premier, mi a bira Parlamentario independiente ora cu MEP a saca Mervin Wyatt Ras y mi persona afo door di royeer nos di partido pasobra cu nos a vota pa e ' versoberingswet' caminda cu como politico nos a give up nos derechonan adkeri di pensioen. Pues mi no a sali mi mes dje partido, nan a dicidi saca nos afo ora nos tawata den exterior na december 2010.

- Cuanto partido politico bo a forma parti di dje?

Durante mi 27 aña den politica mi tawata forma parti di MEP pa casi 13 aña, di cual casi cuatro aña como Parlamentario y dos periodo di gobernacion como Minister.
Despues dos aña y mei como Parlamentario Independiente. Despues di tres aña Presidente di Parlamento ora mi tawata forma parti di AVP, mi a bira Parlamentario independiente atrobe. Mi tawata Fractieleider di POR den Staten y 8 luna Minister di Ruimtelijke Ontwikkeling, Infrastructuur en Milieu, y despues cu ma wordu baha como Minister paso mi tawata bringa contra corrupcion den Gobierno, mi a tuma over partido MAS di cual desde 2021 mi ta lider di e partido y Fractieleider den Parlamento di Aruba.

- Pakico bo a disidi di lanta bo mes partido?

Paso na 2021 despues cu e Parlamento forma pa MEP, POR y RED a dicidi bahami como Minister y e Ministerraad a bisa cu tawatin un supuesto ' onwerkbare situatie' despues cu mi a expone e casonan corruptivo cu ma topa durante un reunion publico den Parlamento, un grupo di ciudadano den Pueblo a hasi un apelacion riba mi pa sigui den politica. Asina mi a tuma Partido MAS over y a participa na eleccion 2021.

- Bo ta un di politico na Aruba activo cu a acupa mayoria funcion importante den politica, cu cua funcion bo a logra hasi mas pa pais Aruba y cua cambio esaki nan ta?

Den tur e funccionnan mi a logra trece cambionan positivo pa Pueblo di Aruba. Como Minister entre otro a percura pa un maneho caminda FCCA a bai cumpli bek cu su meta di construi proyectonan di cas social pa esnan den mas necesidad na por ehempel Cura Cabai, Bushiri, Jaburibari, aanleunwoningen na Ambiente Feliz na Santa Cruz pa esnan cu limitacion por biba mas independiente, etc, construi skol Kudawecha na Noord, e proyecto di e Cas di Cuido na San Nicolas, careteranan rond Aruba por medio di un Fondo di Caretera, introduci un Plan Nacional pa Enseñanza, bin cu e ley di Ruimtelijke Ordening pa zonifica nos pais, juda lanta Parlamento Hubenil pa nos hobennan siña practica liderazgo y despues tambe desde 2020 scapa Serlimar cu tawata practicamente failliet door di pone bou di supervision financiero cu e Surseance van betaling, combati corrupcion gubernamental y den aparato publico. Tempo mi a inicia como Parlamentario trece iniciativanan di ley pa cambia nos codigo penal pa cu Zedenwetgeving ( delitonan moral) door di hasi castigabel ora abusa di esnan cu limitacion y tambe ora abusa di mucha homber ( e tawata regla pa mucga muher so), introduci e ley di Stalking, etc.

- Cua tawata e desapunto mas grandi pa bo den politica?

Ora cu MEP a saca ami y Mervin inhustamente fei partido, paso nos a entrega nos derechonan adkeri di pensioen.
Tambe ora a bahami como Minister na 2020 paso mi a trece e berdad padilanti di casonan corruptivo cu mi a bin topa den gobernacion. E ' spearfishing' a wordu usa como pretexto/ smoesje.

- Ta dificil pa haya hende profesional drenta politica, kico ta e motibo ?

Tin varios motibo. Algun di nan ta cu professionalnan ta hañe un risico grandi pa drenta politica y pa bai wordu lastra, nan miembronan di famia perhudica of persigui politicamente, nan bida familiar cu menos tempo hunto, e risico pa perde trabou despues, e nivel abou y sushi hopi vez cu ta hiba politica, e chens cu no lo haña trabou bek despues di politica paso ta keda marca, etc etc. Tur esaki despues cu como profesional nan a studia y traha duro pa jega unda nan ta profesionalmente.

- Tin algun partido cu Mas no lo traha cu ne si drenta gobernacion? Y dicon?

Pueblo ta disidi cua partido e lo duna asiento den Parlamento. Ta a base di e escohencia aki, lo haña sa cua partido nan lo por forma por ehempel un coalicion.
En todo caso no ta desea di prolonga e Gobierno caminda tin partido cu:
- a emplea tur nan friends & Family den tur puesto cu lo por a emplea (hobennan) profesional;
- a sera dealnan dudoso y intransparente manera esun di Eagle LNG caminda despues a resulta cu tawatin conseho negativo;
- Concientemente ta enrikese un famia door di repartishon inhusto di trabou;
- Ta persigui hendenan cu no ta di nan color politico, etc.
Pueblo ta harta di e practicanan aki.

- bo tin aspiracion pa un cartera si drenta gobierno y cua esaki lo ta?

Mi tin 27 aña ta sirbi Pueblo den politica, den Parlamento y den Gobierno. Tur funccion ta honorable tanten bo hasie na interes di Aruba.

- Con bo ta haya e nivel di politica na Aruba y kico mester cambia?

E nivel di politica en general ta wordu mira y huzga hopi vez door di loke Pueblo por mira y lesa y scucha via media y rednan social y basa riba esey ta forma opinion riba hende. E nivel tin di haber tambe cu e persona nan cu cada partido tin riba nan lista, y kendenan ta logra drenta Parlamento of bira Minister of ocupa cualkier funccion importante den gobernacion of aparato gubernamental. Pa hisa e nivel di debate den Parlamento, Aruba mester percura pa e Presidente di Parlamento ta un persona cu realmente sa con pa maneha reunionnan segun e Reglamento di Orden, y ta un Parlamentario cu por eleva su mes pa ta neutraal y husto y cu sano juicio ora di dirigi reunionnan, ora e papia den Prensa of den e sala como Presidente, y ora e representa Staten y Aruba sea aki na Aruba of den exterior.

- Con bo relacion ta cu e oponentenan politico?

Den transcurso di añanan mi a conoce hopi persona, y a maak mee cu esnan cu un tempo tawata oponente ta bira colega of esnan cu tawata colega ta transforma den bo enemigo politico. E contacto of relacion cu un otro politico no ta depende solamente di si e ta bo opositor, pero entre otro di e trato di ambos banda.

- Kico bo lo hasi diferente den un siguiente gobernacion?

Percura pa realmente tin screening cada aña dje ministernan, esey no a sosode bou di e gobernashon aki, sino lo por a evita casonan di Ministernan cu a bai fei man y cu Minister President actual a scohe pa sera wowo pe ora ta trata su coleganan durante su gobernashon.

- Pakico e eleccion aki ta asina importante pa Aruba?

Pasobra Aruba no tey vota solamente pa cual programa of plan di partido e ta haña mihor, pero pa determina si bo kier sigui cu e abusonan di poder di e Gobierno actual, e nepotismo caminda ta faborece nan famianan semper, etc y ta mete hasta den entidadnan caminda cu nan no mester mete, perhudicando asina un Pais. Pues ta importante pa sa e posishon di cada partido si e kier djies drenta un gobernacion pa ta den Gobierno of si e ta realisa cu Pueblo di berdad kier un cambio.

- Tin algun ley of punto specifico cu bo lo kier wak cambio den nos systema electoral?

Tin hopi y tur ta scirbi den e Plan di Partido MAS cu jama ',ARUBA merece MAS' y cu ta accesible digitalmente e.o. riba nos Facebook di Partido MAS. Nos enfasis ta pa drecha e calidad di bida di tur esnan cu ta biba na Aruba.

- Tin varios politico bou investigacion, con bo ta wak esaki?

Cu Husticia ta hasiendo su trabou di investigacion y esaki no ta exclui politiconan y/of ex politiconan.

- Como politico bo a yega di wordo investiga?

Si, ma pasa den esaki y despues cu Minister President tawata blo bin acusami durante reunion publico den Parlamento pa sospechoso, aña pasa na april 2023 ma haña un carta di e Procurador General cu ta ilustra cu despues cu nan a hasi un investigacion amplio y largo riba mi maneho di huurgrond ora mi tawata Minister pa 8 luna y pico desde januari 2020, cu Ministerio Publico a constata cu INHUSTAMENTE a bai na considerami un ' verdachte' (sospechoso). Mirando atras esey no mester a pasa mes.

- Cua ta e reto di mas dificil cu bo a pasa aden durante bo carera politico?

E reto mas dificil cu mi a pasa aden durante mi carera politico te cu awo, ta pa combina mi carera politico cu mi bida familiar. Door cu mi 2 jiunan a nace den e temporada cu mi tawata Minister di Infrastructura y Asuntonan social y despues di Enseñanza, y mi a obtene mas cu 4700 voto e tempo ey y despues tambe hopi votos, e tawata un reto pa keda balanza e atencion cu ta duna na Pueblo den un comunidad chikito, combina cu e bida familiar cu jiunan creciente cu merece tur bo tempo y atencion tambe.

- Con bo lo hiba campaña den e proximo siman nan nos dilanti?

Cu contacto cu nos Pueblo y votadornan pa asina hiba e mensahe cu partido MAS ta para pe.

- Cua ta e reto di mas grandi cu e siguiente gobierno ta enfrenta cu ne?

E reto pa sigui cumpli cu e palabracionnan hasi den e Landspakket cu Prome Minister a firma na november 2020, pa trece e reformanan necesario pa pais Aruba.

- Con bo ta hasi comparti tempo entre politica y famia?

Esey semper ta keda un challenge. Pasobra politica no ta un trabou di 8 am pa 5 pm manera hopi kier pone mustra. E ta un vocacion, un yamada pa sirbi.

- Politica tin su pro y su contra, cua esakinan ta pa minister?

Kiko bo ta considera e 'pro y contra' di ta un Minister ta depende di e pensamento y circumstancia di cada persona cu cubri e funccion aki.

- Kico ta bo mensahe pa pueblo di Aruba pa e siguente eleccion?

Mi mensahe ta pa bai vota dia 6 december proximo, bo voto ta determina ken tur lo representabo den Parlamento di Aruba. Vota pa MAS y nos programa practico y realistico y nos candidatonan bon prepara riba nan area di trabou y educashon, cla pa sirbi nos pais.

- Pakico Aruba mester deposita nan confiansa den bo?

Pasobra ma demostra di por traha y ehecuta plan y proyectonan na bienestar di nos hendenan, cu te cu awe ta duna su frutonan pa comunidad y pa futuro generacionnan. Bo por confia cu mi ta tuma desishonnan bon pensa.

-Con bo tin pensa di resolve e debe cu Aruba tin cu Hulanda?

Door di cumpli cu palabracionan hasi y percura por medio di un Rijkswet ( ley di reino) pa trece e disciplina financiero cu nos mester tin, y stop di benta e responsabilidad aki den scochi di nos jiunan door di keda schuif cos cada vez.

- Aruba tin confiansa den su politico nan? y si ta no, kico por hasi pa cambia esaki?

6 di december nos lo haña sa den cua politiconan Pueblo tin confianza pa traha pe.

- Mensahe final di Marisol Tromp?

Pa cada persona cu haña su carchi di vota, hasi uso di dje door di bai vota. No benta bo oportunidad afo. Hende nan ta expresa nan disgusto y malcontento tur dia, awel awor te momento pa disidi ken tur bo kier representabo den Parlamento.

Marisol Tromp
Lider di partido MAS