“Mi yiu Noah a muri na un forma horibel y cruel” ta conclusion di mama Noemi Maduro.

​

Dia 24 di maart 2022 Aruba un biaha mas ta uni den dolor, tristesa, rabia y emocion, na momento cu un criatura di apenas 4 luna ta fayece di un morto abrupto y dolosoro. Sea ta na cas, scol, of den un auto, Aruba completo ta haya un shock, pero despues di algun dia, siman of luna tur cos ta normalisa bek y tur hende, cu excepcion di e famia envolvi, ta bay bek na nan bida y rutina diario…te ora algo lamentabel bolbe sosode. Un ‘circulo vicioso’ masha comun riba e pais aki. 

Durante un conferencia awe mainta na ATIA, e mama di Noah; Noemi Maduro compaña pa pediatra; dr. E. Arends y hefe di servicio di ambulance; I. Hoek a elabora ampliamente riba morto tragico di baby Noah. Tur cos a cuminsa diahuebs mainta, ora cu apenas e dia a inicia y cu mayoria hende ta laborando y e muchanan na scol, e mama ta ricibi un yamada pa 8:33 am di scol, bisando: Noemi, bini…Noah no ta reaccionando!” 

E mama a indica, cu ta su yamada na 100, a pone polis bati alarm ana 911. E mama a kere cu ya e centro di cuido di mucha a bati alarma na 911, pero lamentablemente esey no tabata e caso. Pues ta te 8:37 am e prome melding a drenta 911 di 100 y esaki ta confirma pa tanto polis como ambulance e mainta aki. 

Pediatra, dr. E. Arends a indica cu Noah tabata un mucha saludabel y conclusion di e patologo ta, cu mas sigur pa falta di oxigeno e organonan a stop di funciona y consecuentemene e baby a fayece. Pues morto door di aspiracion. Cu esaki ta bari tur ‘rumor’ for di mesa, manera; e baby tabata prematuro, tabatin problema di salud of problema di curason. “Baby Noah tabata un ‘gezonde zuigeling’ di 4 luna!” ta loke e dokternan ta enfatisa. 

Na momento cu e tata a yega e centro di cuido den fraccion di 2-3 minuut, loke el a presencia ta keda mane un video bibo den su mente pa resto di su bida. Un dolor y recuerdo horibel y cruel di e ultimo momentonan di su yiu chikito, cu ya tabata biña caba na e sitio y el a wak con e doño di e centro di cuido tabata duna CPR na su yiu cu su mannan. 

Hefe di servicio di ambulance, I.Hoek tambe a elabora riba algun punto relevante y importante. Tin procedura cu mester sigui y esey ta para den nan protocol tambe. El a indica cu e personal completo di e centronan di cuido mester ta ekipa pa duna asistencia den e prome minuutnan di crisis, te ora cu ambulance yega. “15% di e yamadanan cu nos ta haya pa asistencia pa 0-4 aña, ta pa problema respiratorio. E cifra di 15% ey por mustra poco, pero pa un isla chikito e ta hopi. Cada minuut y seconde ta conta!”. El a conclui bisando, cu si a haci e yamada na tempo of di biaha, por a scapa e baby. 

 

Finalmente tin 5 proceso cu a conduci na e morto tragico y doloroso aki:

1. Noah a keda di 7:15 am te 8:00 pasa den un carier.

2. A saca Noah for di e carier y a pone den cama y a bira bay coy otro baby. 

3. A pone Noah boca abou y esaki ta confirma p’e propio centro di cuido.                                                        4. Unda e yamada na 911 di e centro di cuido a keda?                                                                                                   5. Un autopsia detaya y specifica di cada organo di Noah, cu tabata den perfecto condicion. 

No tin duda cu Noah a muri cruel y horibel y manera e mama a indica na final: “Tanten e mama aki tin bida, salud y rosea, mi lo keda traha di cerca cu e fundacionnan , instancianan di gobierno of no, paso ta tuma un comunidad pa lanta un mucha. Y mi no desea di wak e isla aki, traha cu otro y no isla-isla mas.” Definitivamente awor ta e momento pa nos reenforsa otro y hunto traha na e meta final cu mester ta bienestar y siguridad general di nos muchanan.