Finalista di Miss Inglatera kibrando tur ‘tradicion’ den un certamen di beyesa

​

Un finalista di Miss Inglatera awor tin e atencion di internet y media mundial, pa ta e prome dama den historia di 94 aña di certamen di beyesa, cu a scoge pa competi sin makeup. Ta trata di Melisa Raouf, (20), un dama di London, cu a dicidi pa trece un cambio bastante desafiante, den un concurso di Miss Inglatera. E hoben aki ta studia politica na King’s College y sorprendemente ta kibrando tur expectativa di certamen di beyesa di hende muher, unda el a pasa exitosamente pa e rond final di e certamen. Mester enfatisa tambe cu su aparencia natural ta impresionante y esey ta di aplaudi. Melisa su escogencia di aparece natural tambe a haya atencion inmediato di e organisadornan di e certamen, unda nan a indica cu esaki sigur ta e prome biaha cu nan ta experiencia esaki. Melisa Raouf a scoge conscientemente pa competi sin makeup, pa inspira otro hende muher pa nan sea acepta y stima nan mes, na nan forma natural y e kiermen cu esaki ta “nifica hopi p’e.” Den un era, unda social media ta un preocupacion, Melisa a indica cu el a haci e decision desafiante y poco comun aki, pa competi ‘bare-faced’ pa realmente promove beyesa interior. Den un entrevista Melisa a bisa:"If one is happy in their own skin we should not be made to cover up our face with makeup. Our flaws make us who we are and that's what makes every individual unique."