Mucha ta sobrevivi milagrosamente despues cu su cabes a separa for di su nek.

​

Suleiman Hassan di 12 aña tawata coriendo bais na momento cu un auto a dal e.
E hoben a keda transporta cu helicopter pa unidad di Trauma na hospital Hadassah situa na Jerusalem.
E la keda cu fractura na su cabes, su nek y scheur den e ligamento cu ta conecta su weso di lomba.

E ortopedico, Dr. Ohad Einav cu a guia e operacion a splica cu e procedura a dura hopi largo y a rekeri pa dokter nan hasi uzo di plachi nan di hero na e area cu a ricibi daño.
E operacion aki a tuma lugar na Juni pero medico nan a warda un luna pa por anuncia e resultado y recientemente a manda Suleiman cas y lo sigui monitor su recuperacion.

Suleiman tawata tin solamente 50% probabilidad di sobrevivencia y su recuperacion sigur tawata un milager.
Na November 2022 tambe a realisa un cirugia di desconexion interno di cabes unda cu despues di e recuperacion, e persona mester a siña con pa cana di nobo. 

“Nos abilidad pa salba bida di e mucha tawata danki na e tecnologia mas innovativo y e team medico cu a lucha hunto. Esaki no ta un cirugia comun, specialmente no riba un mucha y e ta un cirugia hopi delicado. E hecho cu e mucha a keda bon y por cana sin ayudo necesario despues di un proceso asina ta algo extraordinario.” 
Asina Dr. Einav a expresa na ‘The Times of Israel’.

E tata di Suleiman a keda banda di su yiu durante ful e proceso aki y a gradici ful e staf medico inmensamente pa salba bida di su yiu, apesar cu e peliger tawata grandi y e probabilidad di bida tawata minimo. 
“Locual cu a salba bida di mi yiu tawata e profesionalismo, e tecnologia y e conocemento pa por tuma decision nan inmediato di parti di e team medico. Nan ta un bendicion y mi lo gradici nan henter mi bida.”