Listen Live !

Watch Live !

Politico di siman Geoffrey Brian Wever: Rikesa di Aruba mester bay bek den cada hogar.

Awe team Ivo 4 Life ta presenta e di 4 politico di siman:

Geoffrey Brian Wever

Nomber completo y fecha di nacemento?
Geoffrey Brian Wever a nace dia 18 di december 1980 na Almelo, Hulanda.

- Conta nos un tiki di minister su infancia, cua scol Minister a bay, hobby y kico tawata e prome funcion cu minister kier a eherce tempo bo tawata chikito?
Geoffrey ta e yiu mayor, su mama ta di Savaneta y su tata ta di Brazil, y hunto cu un ruman muhe, nan ta forma un famia chikito y uni. Na edad di 9 aña, Geoffrey su mayornan a bin biba na Aruba caminda el a bishita Scol Reina Beatrix y Colegio Conrado Coronel, sigui pa Colegio Arubano, VWO.

- Na unda minister a studia y con e experencia di studiante tawata pa bo y cua ta e diploma nan cu minister a logra?
Na 1999, despues di a gradua di VWO na Colegio Arubano, Geoffrey a bay Hulanda pa sigui cu su estudio den e area di ley. Ela logra un Master den Notarieel Recht y un Master den Fiscaal Recht.

By: Zaynah Yanez

5 november 2024

-Con minister a drenta politica? Pakico minister a scohe partido Raiz pa cuminsa y awo a cambia pa Futuro?
Na aña 2021, Geoffrey a uni cu e plataforma politico RAIZ cu e proposito di uza su conocemento y experiencia pa traha na fabor di bienestar di pueblo y pa trece un miho futuro pa generacionnan venidero. Na juni 2021, el a bira miembro di Parlamento y lider di fraccion di RAIZ den Parlamento. Na september 2021, el a ser
nombra como Minister di Asuntonan Economico, Comunicacion y Desaroyo Sostenibel. Desde october 2024, Geoffrey ta co-lidera partido nobo, FUTURO.
El a yega na e conclusion pa bay di partido Raiz pa partido Futuro door cu e tin un vision di gobernacion y politico diferente. Y e kier duna un contribucion diferente na politica di Aruba. E constelacion actual no ta fit mas cu e vision pa gobernacion y politico. E no ta un evento, pero un serie di evento, pero a palabra cu ta mantene esaki interno.

- Ta minister pa un partido y campaña pa otro a trece hopi pregunta den pueblo con minister por splica esaki?
Tin projectonan pa caba, si ela tuma su retiro como minister esaki lo a tranka projectonan. Tambe e tin e sosten di su ex coleganan di partido Raiz.

- Cua ta e logro di mas grandi como minister di economia?
Tin varios cu e ta considera como logro, pero Restauracion Cas Veneranda sigur ta un grandi y tambe Competencia Husto y Proteccion di Consumidor.

-Pakico Minister a laga un carera exitoso den abogacia pa drenta politica?
Semper e tawata tin e deseo di un dia contribui activamente na Pais Aruba, y desde cu el a bira tata, e deseo ey a bira mas fuerte. El a realisa cu e NO por keda para un banda y, for di un posicion di comfortabilidad, observa e desaroyo di nos pais.

-Tin deseo pa keda cu e mesun cartera den un siguiente gobernacion? Kico falta pa logra ainda?
Ainda tin varios projecto cu e kier finalisa.

-Kico partido Futuro tin cu partido Raiz no por a cumpli cu ne cu a hasi cu minister a cambia?
Su vision di gobernacion y politico ta diferente. Y e kier duna un contribucion diferente na politica di Aruba. E constelacion actual no ta fit mas cu e vision pa gobernacion y politico.

-Futuro a logra haya su firmanan necesario den 1 dia, kico esaki por bisa di e aceptacion di e partido pa eleccion?
E ta mustra cu pueblo kier wak un cambio.

-Tin varios politico bou investigacion, con minister ta wak esaki?
Ta hopi lamentabel y inaceptabel cu esaki ta e caso den 2024.

-Con minister lo hiba campaña den e proximo siman nan nos dilanti?
E lo ta den bario ta combersa cu nos ciudadanonan, lo bishita cas, lo ricibi hende na su cas, y lo ta activo riba Facebook y Whatsapp.

-Kico ta minister su mensahe pa pueblo di Aruba pa e siguiente eleccion?
Respet pa tur hende. Su vision pa futuro di Aruba ta un pais caminda e rikesa di pais Aruba ta bay bek den cada hogar, pa asina cada ciudadano por ta parti di e desaroyo y prosperidad. Su
aspiracion ta pa pueblo por tuma control di su destino y pa generacionnan
venidero por hereda un pais prospero y fuerte.