Listen Live !

Watch Live !

Personahe di siman: Ronchi De cuba

Ken ta Ronchi? Ronchi ta un persona hopi priva cu ta biba un bida publico. Manera tur hende sa Ronchi ta un figura publico na Aruba pa varios aña caba, Ronchi a hasi mas cu 1500 show na Aruba, su shownan di mas grandi tabata 'Style', un show teatrico di moda cu mas di 130 modelo cu tabata wordo presenta tur aña pa 3 anochi. Ronchi ta un persona di Hopi Fe den DIOS. Ronchi ta conta nos cu e ta un persona optimista y alegre di naturalesa, sinembargo ronchi ta un persona cu no ta duna importancia en lo absoluto ariba locual otronan ta pensa di dje sino mas na locual e ta pensa di su mes. Ronchi su bida professional ta requiri pa ta den wowo di hende y constantemente hopi atencion riba dje, pues Ronchi su bida personal y familiar ta priva y esey ta hopi importante pa Ronchi.

Ronchi a studia "Fashion Design & Event Production" na International Fine Arts College na Miami. Den Ronchi su tempo liber e gusta wak pelicula 'Sci-fi', 'fantasy' & 'period pieces'. Ronchi ta purba engrandence su conocimento tur dia door di wak 'documentaries' di diferente topico. Tur cos a cuminsa na 1989 ora Ronchi tabata tin 18 aña e cu su friends nan a dicidi di hasi un 'Fashion Show' esey tabata e inicio di su carera den moda. Den e temporada cu Ronchi a bay studia na Miami 'South Beach' a haña e 'Boom di fashion y art' ey nan ta unda e la cuminsa desaroya su estetica como diseñador. Ronchi ta splica cu Fashion ta un 'non verbal representation card' e ta e manera cu cada persona ta dicidi di expresa nan mes, Ronchi no ta mira moda como un dictadura sino como un tool pa cada individuo usa pa asina expresa nan indentidad.

Ronchi su inspiracion di mas grandi ta su mama, sinembargo na e nivel professional Ronchi a wordo inspira pa hopi factor, manera Historia, Pelicula, Musica y e ser humano, Ronchi por mira un hende riba caya y ta wordo inspira automaticamente. Ronchi ta menciona cu Aruba su energia semper ta presente den su coleccion y piezanan cu e ta diseña. Ronchi a diseña pa hopi artista grandi local y internacional por ehempel pa Jeon den e video clip global di Machika, pues tambe den exterior pa varios actriz y actor di Latino America.

Ronchi ta conta nos tambe cu KOMA models a sera su portanan dia 31 di October 2019. E agencia a wordo estableci na 1989, a descubri, desaroya y lanza mas di 5000 hende na Aruba. KOMA models ta un punto importante pa Ronchi su carera y e ta splica cu mira hobennan di Aruba bay dilanta y haña mas auto-estima ta un felicidad grandi pe. Ronchi su conseho pa un hoben cu den futuro lo kier habri su mesun negoshi ta pa percura pa e hoben hasi algo cu e gusta y stima, e ora e no ta bay sinti manera un trabao. Y e mas importante ta pa no laga hende kibra bo, Ronchi ta menciona cu si e mester a duna atencion na tur e criticanan nunca e no lo por a yega unda cu e ta awe, exito ta requiri trabao y determinacion. Planificacion y accion ta super importante. Personalidad amable, professional y amical ta ingrediente esencial pa un hende por logra. Ronchi su ultimo palabranan ta 'No sinta culpa hende pa bo fracasonan pasobra esaki no ta yuda bo mehora y progresa, one step at a time, one day at a time'.