Hoben Arubiano hungando baseball a ricibi homenahe special.

Rachyd Omar Baroud a nace na Aruba dia 1 di october 2007, cual ta mesun fecha natal cu su idolo deportivo local y internacional; Xander Bogaerts. Rachyd a nace cu un banda di man, pero esey nunca a limit’e pa sigui su soño. Door cu Rachyd su ruman grandi, Karym, a cuminsa train baseball cu su cuater aña, Rachyd tambe tabata pidi su mama pa e train baseball y actualmente e tin 12 aña hungando su deporte faborito. 

E mama a dicidi di puntra e coach y a haci investigacion pa su yiu. Rachyd a logra drenta team di baseball y ora cu un coach di Merca a bin Aruba, el a trece un glove chikito banda drechi p’e.  Na mes momento un otro coach, a dicidi pa traha un bate chikito banda rechts, pa asina Rachyd por cuminsa hunga den e team di Hammersharks. 

Rachyd a cuminsa hunga baseball cu dos aña y mey di edad. Prome biaha cu el a hunga, tabata den e weganan di Liga Menor (Abba) na aña 2010. Rachyd a nace cu Limb Defects (Amniotic Band Syndrome), cual ta sindrome cu durante embarazo di su mama, su man y su dedenan na man robes no a desaroya y su man ta mas cortico cu e otro. Por lo demas Rachyd ta gosa di un bon salud, ta siña bon na scol y ta bay su controlnan cada biaha cerca su dokter na e centro di rehabilitacion na Utrecht, Hulanda. 

Na juli 2018 Rachyd a bay residencia na Lelystad, Hulanda y ya pa october 2018, e mama e inscribi Raychd y su ruman den baseball na Hulanda. Tabata tin un homenahe di Gemeente y Sportbedrijf pa e team campeon di baseball, di cual Rachyd y su ruman ta hunga aden y banda di esey, a honr’e tambe como un persona ehemplar y sigur un inspiracion pa otro.

Na principio, ora nan wak e pa prome biaha, nan a keda sorprendi y ta puntra: ‘Con e por hunga baseball, mientras cu e deporte ta rekeri pa hunga cu dos man?’ Pero despues cu na a wak e hunga, nan a apoy’e, yud’e y hasta e muchanan di e team contrario a bin cerca dje, pa salud’e y bis’e cu nan tin hopi respet y admiracion p’e. Y esaki ta sosode te ainda. 

Rachyd ta den klas 3 Mavo (TL) y ta studiando pa bira un ingeniero den programacion di computer. Pa HCAW U15-1 Honkbal & Softball team na Bussum, Rachyd ta hunga ‘1 klasse’, cual ta considera como un top sporter. El a bira campeon na aña 2019 cu su prome team, Flcons Lelystad y recien Best pitcher 2022 pa su club HCAW Cy Young Award. 

Rachyd tin hopi meta su dilanti y un di nan sigur ta, pa bira un pitcher profesional. Durante e weganan e sa haya golpi cu bala. Ultimo mes el a picha na Amsterdam y el a haya un bala den su brasa, pero asina mes, el a para fuerte pa no laga su team na caya y a sigui picha cu tur e dolor. Rachyd ta mentalmente fuerte prepara y e sa cu e bala por dal e, sea ora e bay bati of picha. Na october 2019 el a sali na di 3 lugar den e competencia di talento deportivo di e muchanan cu ta haci deporte, pero cu nan tin un limitacion. 

Rachyd su conseho pa e tur e hobennan ta, pa nunca give up y bay pa locual bo gusta. Semper pensa cu nada ta imposibel pa logra den e bida aki.