Resto nan humano horta for di cadaver nan na Harvard Medical School. 

Gerente di funeraria di Harvard a keda acusa pa bende parti nan di cadaver humano.

Un grupo di persona a keda deteni y ta enfrenta cargo federal despues di keda acusa door di Fiscal pa participa den un plan nacional di cumpra, bende y manda resto nan humano horta for di funeraria di e scol di medicina di Harvard y un funeraria di Arkansas.

Cedric Lodge di 55 aña, ken a administra e funeraria na Harvard pa e programa di donacion anatomico di e scol di medicina ta un di e detenido nan. 
Lodge hunto cu e otro acusado nan ta frenta un sentencia maximo di 15 aña di prizon pa e delito nan cu a tuma lugar entre 2018 y 2022 segun e oficina di Fiscal di Merca.

Lodge a keda acusa di horta organo nan y otro parti nan di curpa incluyendo cabes, celebro, cuero y weso di e cadaver nan duna como donacion pa investigacion medico prome cu cremacion tuma lugar. Segun Fiscal, Lodge tawata tranporta e parti nan humano aki cu e la horta y hiba nan na su residencia na New Hampshire na unda e y su casa Denise Lodge a keda acusa di a bende esaki nan. 
A nota ta cu tambe tawata tin dos caso na unda e parti nan humano a ser tuma for di cadaver di dos baby cu a nace morto na un funeraria na Little Rock, Arkansas.

E otro acusado nan ta esnan cu a cumpra e parti nan humano aki.
E cliente mas grandi tawata Katrina MacLean, doño di un tienda cu yama ‘Kat’s Creepy Creations’ na Massachusetts. Lodge tawata permiti MacLean pa bishita e funeraria pa asina e examina e curpa nan y mira cua parti nan e lo por bende mas mihor. 
Fiscal ta acusa Lodge di ricibi un total di $37.355.56 na pago via PayPal riba un cuenta di su casa. Transaccion nan a ser haya entre otro cu e descripcion ‘braiiiinnns’ pa suma di $200,-, otro di $600,- pa dos cabes y e ultimo tawata di $1000,- cu e descripcion ‘Cabes number 7’. 

E ta espantoso cu e victima nan aki a ofrece nan curpa voluntariamente, confiando cu esaki lo aporta na educacion medicinal. 
Harvard ta depende riba donante pa nan programa anatomico y ta sinti desapunta y traiciona cu e tragedia aki. E scol ta priminti di tuma contacto y brinda apoyo na cada familiar asina cu logra identifica e curpa nan envolvi.