Rikkie Valerie Kolle a marca historia como e prome transgender pa keda corona como Miss Universe Holland 2023. 

E victoria di Rikkie a genera hopi atencion pa su significado historico. 
E ta e di dos participante transgender pa competi den e certamen di Miss Universe siguiendo e paso nan di Angela Ponce, Miss Universe Spain, cu tambe a marca historia na 2018 como e prome participante transgender.

Un mucha homber di Breda, cu na edad di 8 aña tawata sinti cu e no ta pertenece den su curpa y cu 11 aña Rik a cambia su nomber pa Rikkie. 
Su proceso di transicion a cuminsa cu 16 aña y na comienso di e aña aki e la finalisa cu su operacion di cambio pa muhe. 
Apesar di a pasa hopi momento nan di burla e semper a conta cu apoyo di su famia y amistad nan. 
Rikkie su carera den e mundo di modelahe a cuminsa cu 17 aña na 2018 cu su participacion den e programa di television ‘Holland’s Next Top Model’ unda e la keda como prome finalista. 

Rikkie kier ta un voz pa su comunidad y e ta aspira pa inspira otro nan pa sigui nan soño apesar di e expectativa nan di sociedad. 

Segun hurado nan, e finalista a luci durante ful e show y e tin e progreso mas grandi durante henter e certamen.
Nan ta convenci cu e organisacion di Miss Universe lo disfruta di traha cu Rikkie.
E tin un storia y un mision fuerte.