Su pareha virtual no tawata existi y señora a bay cera pa fraude.

​

Manjit Singh di 60 aña tawata traha na un oficina di abogado na Inglatera.
Poco despues cu su casa a bay lage durante cu e tawata ricibi tratamento pa Cancer, e la conoce un homber yama “Ravi Jani” a traves di un aplicacion riba internet cu supuestamente tawata biba na Dubai. 

Nan a tene un relacion virtual di algun luna y nan tawata hasta yama otro 4 pa 5 biaha pa siman.
Na dado momento Ravi a bisa Singh cu e kier casa cu ne y a pidie pa prest’e placa, primintiendo cu e lo debolbe tur e placa cu e la presta.
Durante di e temporada aki Singh a haya un oportunidad di crece den e compania unda e ta traha. 
E la keda encarga di algun caso y e la keda responsabel di cuenta nan di e compania unda e mester a haci transferencia nan interno y externo. 
Singh a probecha di e posicion aki pa haci su movecion nan fraudulento. 

E propietario di e compania, Naeem Baig, a keda sorprendi na momento cu ela verifica e saldo nan di cuenta y despues di analisa tur cos e la descubri cu tawata tin por lo menos ocho transaccion inexplicabel haci na un cuenta na Irlanda, bou di e nomber ‘Patricia Flannery’. 
Singh a realisa varios pago cu a yega un suma total di casi mil miyon pound.
Na prome instante Singh a bisa cu tur transaccion tawata corecto y e dia siguiente e la informa cu e tawata tin e intencion di haci diferente transaccion via su cuenta personal di banco pero e la haci un fout y a uza e cuenta di e compania.
Despues di haci investigacion a haya dos otro cuenta di banco cu tawata imposibel di verifica y Ravi cu a haci uzo di un identidad falso tawata na Sur Africa y no por a wordo captura.

Recientemente Hues a dicta un sentencia di dos aña di prizon pa Singh despues cu e mes a admiti culpabilidad di ocho cargo di fraude pa abuso di su posicion laboral. 
“E cantidad cu bo a horta ta bastante asombroso. No solamente bo a comete fraude pero bo mes tawata victima di un fraude romantico. Bo no a ricibi ningun cen di e placa cu bo a bay cune. Esaki ta indica cu Ravi a manipula bo pero na mesun momento bo tawata consciente di cu locual bo tawata haciendo no ta corecto.“
Asina aki e huez David Aubrey KC a expresa na Singh prome cu e la dicta su sentencia.