Tata ta maltrata su dos yiu chikito nan y cera nan den haula di cacho

Autoridad nan a haya dos mucha cera den haula di cacho na un cas na Las Vegas, un di 9 y e otro di 11 aña. 
Un di e mucha nan tawata serca di fayece door di varios golpi ocasiona door di su tata.
Autoridad nan a haya e mucha cu dos wowo preto completamente hincha y cu varios marca y blauw na su curpa y e mucha tawata completamente desnutri.
Esaki no tawata e unico forma di maltrato cu e mucha nan a ricibi, e mucha nan mes a conta cu nan no tawata haya alimentacion mane debe ser y nan tawata wordo bati cu cabuya, faha y hasta cu un wea.
“E la dal mi cara den e haula paso mi tawata purbando di sali, mi no a hasi nada y e la dunami miedo. Nos ta keda cera henter dia, tur dia.” Asina un di e mucha nan a expresa na e detective y por mira esaki den e video comparti.

Autoridad nan a yega na e sitio despues di un yamada di emergencia di Amanda Stamper, mama di e mucha nan. 
Amanda a sigura cu e ta victima di violencia domestico di parti di su pareha, Travis Doss.
Ambos a keda deteni, e tata a keda acusa di 40 delito incluyendo varios cargo di abuso infantil y e mama tambe a keda acusa di 7 cargo di abuso infantil pero no a acepta niun.
E media 8 News Now a comparti algun documento hudicial di corte relaciona cu e hecho aki, di cual a cualifica esaki como e pio caso di abuso di mucha cu nan a conoce.