Un aventura amoroso cu a termina den ladronicia.

 

Jorge Delgadillo (63) a conoce un mucha muher cu ta 40 aña menos cu ne via Tinder. E dama hoben aki a drog’e y horta tur cos den su cas, den compania di su amiga. Esaki a pasa na La Plata Argentina siman pasa. 

 

E victima a ricibi e mucha muher na su cas pa prome biaha, despues cu nan tawatin un relacion virtual durante 3 luna.

 

Delgadillo, ta sigui conta, cu el a invita e hoben di 20 aña di edad y su amiga, pa drenta su cas. Nan tawata pasando momento dushi y agradabel, unda nan tawata come, bebe biña, y scucha musica. Diripiente el a cuminsa sinti marea y cu hopi soño.

Prome cu el a bay full off of pega soño di e efectonan cu nan a tira den su bebida, el a bisa cu e tin casi sigur cu el a lucha y defende su mes cu su mannan, di un atake di golpi.

 

“Mi a lanta te e siguiente dia pa 11 or di mainta, danki na un amigo cu a bin bishita mi na mi cas. Esaki tawata door cu mi no a responde na e bel di mi porta. El a keda insisti asina hopi, cu mi a logra lanta for di e vloer cu hopi dolor, hopi zwaak y sin forza di mi curpa. Mi brasa- y pianan tawata mara cu tape. Nan a golpia mi masha hopi mes”. 

 

Delgadillo y su amigo a keda hopi spanta y sorprendi di a wak e disaster cu e dos muhernan a haci na e cas, y di e golpinan cu el a ricibi na su cara y ful su curpa. 

 

Ora cu el a spierta, el a ripara cu e ladronanan a bay cu su placa cash, su documentonan, un PlayStation 4, su celular y nan a huy den su Volkswagen Gol Trend color shinishi. Ambos dama hoben ta profugo y polis ta buscando nan.