Pa 1 anochi so, despues di un break di 2 aña, long table Aruba, organisa pa Wind Creek Aruba ta bek cu su di 4 edicion. E unico mesa di cena di mas largo completamente blanco cu un balor di $40.000 na Aruba! 

 

Tickets pa e evento aki por wordo reserva for di diaranson dia 15 di juni na 523-6187 for di 9 ‘or te cu 4 ‘or di atardi. Cada persona lo tin un maximo di 10 tickets cu e por reserva.

E evento lo tuma luga e aña aki riba diadomingo 28 di augustus cu tambe lo ta e celebracion di e prome lustro, pues e 5 aña aniversario di Wind Creek Hospitality hunto cu Renaissance Aruba. Pa e tremendo celebracion aki, Wind Creek Hospitality lo surpasa e suma di donacionannan anterior di long table Aruba y ta entrega  $40.000 na un organisacion local.

Desde diaranson dia 15 di juni, organisacionnan local cu ta interesa pa forma parti di e competencia por registra na Wind Creek Aruba su “community online video program”, organisacionnan local lo tin cu crea un video splicando e motibo pakico nan ta desea pa ricibi e donacion aki. Tur video cu wordo entrega lo wordo publica riba Wind Creek Aruba su website unda cu pueblo di Aruba lo por vota pa e video ganado cu lo ricibi e suma di $40.000 

 

Tene e siguiente puntonan den consideracion:

• Solamente organisacionnan local - non profit y cu ta activo por participa na e competencia (empleado den servicio di Wind Creek Aruba no por participa) 

• Lo mester entrega un video di 30 pa 60 seconde mustrando e meta di e organisacion, ken nan ta, kico nan ta haci y pakico nan ta desea di wordo scogi 

• Tur video ricibi lo wordo publica sin ordo riba e pagina di Facebook di Long Table Aruba for 1 di juli te cu 9 di augustus pa asina e pueblo por admira.

• E pueblo por vota pa nan video preferi entre 10 y 24 di augustus. 

 

“Wind Creek Aruba ta orguyoso di por trece e forma di participacion aki caminda e pueblo hunto cu organisacionnan local por ta envolvi den e evento e aña aki. E obhetivo di e progama di video aki ta pa elogia e bon trabou cu ta wordo haci na Aruba, specialmente durante e ultimo 2 aña cu ta tras di lomba.  Alabes nos ta entusiasma pa siña conoce mas organisacionnan y nan mision y nos ta spera di pone nan den e spotlight.” Asina Sr. Paul Gielen Gerente General di Wind Creek Aruba a menciona.

 

Desde 2017 long table Aruba a recauda mas di $75.000 pa diferente organisacion na Aruba y e ta e evento principal caminda Wind Creek ta duna bek na e comunidad di Aruba. Haci un impacto den e comunidad y duna alivio durante calamidad ta un principio di operacion di Wind Creek Aruba. Desde yegada di Wind Creek na Aruba nan a recauda fondo pa medio di diferente evento, manera Long Table Aruba y Winter Wonderland como tambe un cantidad di donacion di cuminda cu a wordo entrega henter aña durante e periodo di pandemia na organisacionnan y personanan den nececidad.