Wendrick Cicilia futuro generacion di Avp. "mester mantene pasenshi y kere den e momento perfecto di Dios".

​

Awe nos team a entrevista e di dos politico cu ta forma parti di partido Avp cu ta Wendrick Cicilia.

​​

Nomber completo y fecha di nacemento?

Wendrick Chervic Cicilia a nace 5 di maart 1996

​

Conta nos un tiki di bo infancia, cua skol bo a bay, Hobby y kico tabata e prome funcion cu bo kier a eherce tempo bo tabata chikito?

​

Mi infancia tabata un hopi agradabel yena cu alegria y varios experencia bunita y unico. Mi infancia mi a pasa na Bonaire, den e humilde bario di Rincon. Unda mi a siña cu diciplina t’e yabi pa exito. Mi a lanta cu e expresionnan cu “trabou duro ta paga”. Cumi 8 aña mi a bin biba na Aruba hunto cu mi mama Jasmine Caraballo Cicilia y Marcel Cicilia. Mi a core y hunga den e bario di Brazil un tiki pabou di e Parokia Cristo Rey, na Noord Cura Cabay 113 na cas di mi wela Maria Caraballo y Nino (Vicente) Caraballo. Mi a practica e deporte di futbol pa Brazil Juniors. Mi welo y wela a deposita den mi e balor di busca Dios. Algun aña despues nos a muda p’e bario di Pos Chikito. Mi amor pa deporte a hiba mi pa sigui practica futbol, e biaha aki pa S.V. San Luis y S.V. La Fama den e bario di Savaneta. Practicando mi hobby rib’e veld di futbol y hungando den bario cu mi ruman morocho y amigonan ta e momento nan mas agradabel di mi infancia. Mi a haci enseñansa basico na Colegio Sagrado Curason. Despues mi a continua mi estudio secundario na Colegio Arubano na unda na 2015 mi a caba mi VWO. Mi ta agredicido na cada docente cu a kere den mi y a inverti den mi ora cu ami mes no tabata kere den mi capacidad. Desde mi infancia mi tabata sinti e pasion pa yuda hende den nan momentonan mas vulnerabel, pa motibo aki mi dream job tabata pa ta un medico.

​

Na unda bo a studia y con e experencia di ta studiante tawata pa bo y cua ta e diploma nan cu bo a logra?

​

Mi a studia ley na Universidad di Aruba na facultad di derecho. E sentimento di necesidad pa yuda esun nan mas vulnerabel a pone mi scoge pa studia ley. Na 2021 mi a termina mi Bachelor of Law y 7 di october proximo lo mi ricibi mi titulo di Masters of Law. Durante mi temporada di estudio mi a conoce amistadnan cu causa un impacto positivo den mi bida.

​

Con bo a drenta politica? Pakiko bo a scohe partido AVP pa ta bo partido pa eleccion cuanto voto bo a haña den bo prome salida?

​

Mi a nace den un famia unda tabatin animo pa politica. Mi bisawelo Pedrito Brete tabata un di e prome dirigentenan di bario pa AVP den Noord y a traspasa esaki p’e siguiente generacionan cu a sigui.
Na 2018 mi a asocia mi mes na e Plataforma di Hobennan Profesional di partido AVP unda cu mi interes pa sirbi mi pais a bira mas fuerte. E deseo pa sostene esunan mas vulnerabel den nos comunidad y mira Aruba desaroya positivamente den direccion di innovacion y modernismo a motiva mi pa tuma e decision pa postula mi mes riba e lista di partido AVP na 2021. Mi ta kere den e balornan di partido AVP manera solidaridad, responsabilidad comparti, sostenibilidad y husticia social. AVP semper a presenta un vision cu bista pa futuro. Manera e vision di “Green Energy” pa Aruba, introduci dialogo social y duna importancia na mehora “quality of life” di nos hendenan. AVP semper a combina un vision innovativo y progresivo cu un politica social di cuida esunnan mas vulnerabel den nos comunidad. Esaki ta duna a mi siguransa den mi partido AVP.

Den mi prome salida mi a logra 482 voto di confiansa. Mi ta agradecido cu comunidad pa respalda mi no obstante mi edad. Mi tin e conviccion cu mi comunidad a reconoce mi pasion pa uza e forsa di mi hubentud y conocemento pa sirbi mi comunidad y pais.

​

Bo a traha hopi di cerca cu e fraccion di AVP den parlamento, kico bo a siña? Kico e fraccion di AVP a logra den parlamento? Kico ta bo trabou den parlamento?

​

Mi tin e privilegio di ta trahando hopi di cerca cu e fraccion di AVP den parlamento di Aruba. Den mi posicion como hurista di e fraccion mas grandi den oposicion mi tabata encarga pa scirbi e mocionnan, prepara e conceptonan di ley, propone varios cambio di ley, hiba dialogo cu stakeholders pa crea sosten pa nos vision na Aruba y den exterior. Den e ultimo tres aña mi deseo pa mira cambio den nos comunidad a hiba mi na traha rib’e presupuestonan alternativo na locual cu gobierno a presenta. Mi a contribui na un oposicion constructivo basa riba contenido. Fraccion di AVP t’e unico cu a presenta mas proposicionnan di cambio di ley den parlamento. Nos a presenta e ley pa introduci “gehandicapten uitkering” pa hobennan cu limitacion, nos a presenta dos presupuesto alternativo, nos a presenta e vision pa introduci un Sociaal Economisch Plan bureau pa Aruba, nos a propone cambio nan concreto pa nos ley nan electoral, nos a introduci un cambio di nos leynan di impuesto pa trece alivio pa nos comunidad y nos a bay Hulanda pa concretisa e vision di transforma e debe haci durante pandemia den un fondo di inversion. Esaki ta pa menciona algun di e trabou nan di fraccion di AVP. Fraccion di AVP t’e unico cu a “voegd de daad bij het woord” y a presenta varios cambio y proposicion pa mehora diferente aspecto den bida di nos hendenan.

​

Como hoben den politica kico falta pa tin mas interes di e hobennan pa subi lista?

​

E palabranan di nos himno mester inspira nos: “chikito pero si Respeta”. Nos hobenan mester kere den nan mes y kere den nan pais. Nos mester stimula nan pa nan por kere cu nan tin talento y capacidad pa por haci un impacto positivo den nos comunidad y pais. Mi meta ta pa inspira nos hobenan cu nan tambe por aspira pa realisa logro grandi pa Aruba den politica of den nan area di interes. Como comunidad nos mester stimula e pensamento aki.

​

Con bo ta haya cu e nivel di e reunionnan den parlamento ta bay y kico abo lo cambia?

​

E ta un oportunidad unico pa ta un parlamentario. Bo comunidad a scoge bo pa haci un diferencia y mehora nan aspecto di bida. E nivel di e discusion den parlamento mester eleva. Parlamentario mester haci uzo di su instrumentonan pa haci un diferencia. “Don’t just talk about it, be about it!” Si nos mira e jaarverslag di parlamento cu excepcion di fraccion di AVP niun otro parlamentario ta activo den presenta iniciativanan di ley of proposicion di cambionan di ley. Mi deseo ta pa mira parlamentario prepara y capacita pa asina presenta iniciativa di ley cu beneficio pa nos comunidad. Simplemente vocifera no ta cambia e realidad di nos comunidad, ta momento pa nos parlamentarionan no simplemente papia di e problema pero presenta solucion mediante concepto di ley of proposicion di cambio.
locual cu mester cambia urgentemente ta e relacion entre conseho di minister y parlamento. Mester crea e respet pa nos parlamento como e instituto constitucional mas halto den nos comunidad. E ministernan mester respeta parlamento, y parlamento mester ricibi e derecho pa interumpi e ministernan ora nan ta desvia di e contenido di e reunion.

​

Kico abo lo haci diferente si bo logra bira parlamentario of minister?

Aruba merece un Gobierno di excelencia!
Nos tin cu cambia e manera con ta yega traha maneho. Bolbe envolvi nos comunidad den un proceso di dialogo social ta importante pa nos sigui pa dilanti. Como un mandatario lo mi percura pa nos hendenan

ricibi un alivio mediante sosten financiero pa curbi su gastonan mensual di huur, energia y creche. Nos lo revoluciona nos economia pa garantisa oportunidadnan di trabou nobo pa nos hobennan profesional y oportunidad comercial nobo. Nos lo conecta nos economia local cu e economia global ora nos habri porta pa technologia financiero pa Aruba. Nos adultonan mayor lo ricibi un aumento substancial di pensioen y nos lo inicia e discusion cu Gobierno Hulandes pa Aruba haya un espacio financiero di 900 miyon pa inverti den enseñansa, deporte, maneho di desperdicio, enforsa leynan pa proteccion di esnan mas vulnerable (naturalesa, bestia, nos mucha-y grandinan), diversificacion economico, energia renovabel y mantencion di nos infrastructura y espacio publico.

E proiridad lo ta mehora e aspecto di bida di tur nos hendenan!

​

Tin algun ley of punto specifico cu bo kier traha riba dje una bes bo ta den gobierno?

​

For di un perspectiva di un Hurista mi ta mira hopi deficiencia den e structura di nos leynan. Ley tin e proposito pa proteha nos hende nan y mantene ordo. Locual cu nos ta wak cu ley nan embes di proteha ta perhudica nos hendenan. Parlamento mester aproba ley cu ta beneficia comunidad. Un di e punto nan specifico cu nos mester enfoca ariba ta mehora aspecto di bida general di nos hende nan.

• -  Mi atention lo ta pa introduci un toeslagenstelsel unda cu nos lo duna un sosten financiero na esnan cu tin dificultad pa paga nan huur, gasto di energia y kinderopvang

• -  Nos adulto mayornan merece un aumento di pension, como un hoben mi ta sinti e dolor di mi grandi nan.

• -  Mi lo desea di habri e caminda pa introduci technologia financiero na Aruba pa revoluciona nos economia y crea oportunidad nan nobo.

• -  Lo mi enfoca ariba sigui negosha cu Hulanda pa asina nos por formalisa e fondo di inversion di 900 miyon pa Aruba

• -  Esencial tambe ta un maneho di vivienda pa tur esnan cu ta desea nan propio hogar por yega na esaki mediante flexibilisa e maneho di DIP, stipula den e ROPV un zona pa construccion di vivienda pagabel y stimula construccion di vivienda pagabel

  Den cuadro di ley:

• -  Aruba mester modernisa su leynan laboral y introduci un corte laboral pa defende nos

  empleadonan cu ta sinti nan mes sin protecion.

• -  Nos mester adapta nos ley nan electoral pa fortifica e base di nos democracio, partido AVP ta e

  unico cu a entrega un amienda pa cambia esaki.

• -  Un tema cu ta pasiona mi ta e relacionan den reino. Mi ta kere Aruba merece representacion den

  Tweede kamer Hulandes pa fortifica nos influencia ariba decision nan cu ta wordo tuma na

  Hulanda cu ta afecta nos. Pa esaki sosode nos mester hasi un cambio di Statuut.

• -  Nos mester fortifica nos leynan pa proteha nos muchanan.

  Esaki ta pa mencion algun di e tema nan cu lo ricibi mi atention.

​

​

​